السفارات الاوروبيه بالقاهرة اصدرت بيان رسمي باهم ١٠ اسباب رفض للتأشيرة،
السفارات الاوروبيه بالقاهرة اصدرت بيان رسمي باهم ١٠ اسباب رفض للتأشيرة،
والي يعتبروا من اهم اسباب الرفض لجميع سفارات اوروبا. هقولكم الاسباب العشرة نصا كما ذكرت في بيان السفارة، وبعدين هشرح كل نقطة بالتفصيل (مصدر البيان في اول كومنت)
١- تقديم كشف حساب بنكي باللغة العربية.
كشف الحساب لازم يكون كله باللغة الانجليزية بما في ذلك اسم صاحب الحساب
لو فريق العمل في السفارة غير عربي، هيكون محتاج كشف الحساب بلغة يعرفوا يقروها.
قد تكون دي الحالة ايضا في بعض السفارات الاوروبية الصغيرة الي لا تمتلك موظفين بيقروا عربي.
الحل ساعتها انك تتأكد من لغة المستندات المطلوبة كلها للسفارة. لو البنك بتاعك لا يصدر كشف حساب الا باللغة العربية، عليك ترجمته في مكتب ترجمة معتمد لدى السفارة.
٢- المتقدمين للحصول على التأشيرة بيذكروا قيمة المرتب في خطاب العمل بدون ظهور ذلك الرقم في كشف الحساب.
لازم المرتب المكتوب في خطاب العمل بتاعك يظهر في كشف الحساب بتاعك المتقدم بيه للسفارة.
لو عندك حسابات توفير او شهادات، قدمها هي كمان مع كشف الحساب الرسمي للمرتب بتاعك.
لو انت معندكش كشف حساب لمرتبك والشركة بتدفعلك كاش (او freelancer) يبقى تعمل ايداع بمرتبك كاملا كل شهر في ميعاد ثابت وبعد كدة ابقى اصرف منه وهو في الحساب.
٣- عمل ايداعات غير معلومة المصدر وغير متوقعة في كشف الحساب البنكي.
يجب عليك ايضاح طبيعة هذه الايداعات والاصول.
طبعا في ناس للاسف بتعمل ايداع كبير مرة واحدة في كشف الحساب قبل طباعته للتقديم على التاشيرة.
الموظف مش ساذج علشان يبلع حركة ساذجة زي دي. اعمل ايداع لرقم متوسط قبل التقديم ب٦ شهور، وبعدين اعمل ايداعات صغيرة وقول ان ده شغل اضافي عندك، ايجار شقة،
شهرية ميكروباص، شغال على تاكسي بالليل، المهم يكون ليه مسمى “مصدر دخل”.
٤- تقديم كشف حساب لاصول في صورة “سندات” بدون جواب من البنك يوضح حق العميل لاستخدام هذه الاموال في اي وقت.
غالبا المقصود بده شهادات استثمار في صناديق مالية مملوكة للبنك،
او شهادات قناة السويس، اوشهادات اوعية ادخارية طويلة الآجل. مطلوب منك وانت بتقدم الشهادات دي انك تجيب جواب من البنك يؤكد ان الشهادات دي مش مرهونة مثلا نظير قرض او بطاقة ائتمانية وان بامكانك صرف هذه الاموال المملوكة ليك في اي وقت.
٥- الموظفين لا يتقدموا بخطاب من جهة العمل موضحا سنوات العمل والمرتب الشهري.
طبعا اتكلمنا عن اهمية خطاب العمل وانه لازم يوضح وظيفتك، سنوات التحاقك بالعمل، المرتب الشهري، الموافقة على الاجازة وتاريخ رجوعك منها، وحاجات كتير.
لو انت طالب، بتقدم شهادة قيد جامعي او مدرسي. ممكن كمان تقدم ما يفيد انك دفعت مصاريف العام الجديد (لو بتقدم في اجازة الصيف)، علشان يعرفوا انك دافع المصاريف واكيد راجع تكمل دراستك. طبعا تقديم وصل المصاريف لطلاب كلية تجارة مثلا زي حالاتي لن يكون له فايدة لان المصاريف اكيد ١٠٠ جنية في السنة ولا حاجة هاهاهاها. ولا غليت؟
٦- رؤساء مجلس ادارة الشركات والمساهمين: تقديم الحسابات البنكية الخاصة بالشركة بدون تقديم خطاب من البنك يؤكد احقية المتقديم للسحب من هذا الحساب.
يعني لو انت صاحب نشاط تجاري وقدمت الاوراق المطلوب لاثبات ملكيتك للنشاط ده (سجل تجاري وبطاقة ضريبية)، لازم تقدم مع كشف حساب الشركة جواب من البنك باسماء من لهم حق السحب والتوقيع على الحسابات دي. لو كان حسابك يتطلب توقيعين للسحب، يبقى لازم تقدم موافقة الطرف الثاني على الانفاق من هذا الحساب.
٧- اولياء الامور: التقديم على التاشيرة لاولادكم بدون تقديم كشف حساب بنكي وبدون خطاب يؤكد على نيتكم بتغطية نفقات السفر.
للطلبة والعاطلين عن العمل ولسه اهلم متكفلين بيهم ماديا،
طبعا لازم تقديم كشف حساب من احد الوالدين، او قريب درجة اولى مع اثبات صلة القرابة. يعني لما تقدم بكشف حساب خالك او خالتك مثلا، لازم تقدم شهادة الميلاد لتثبت صلة القرابة بينكم. لو اسماء عمك او عمتك مختلفة عن اسمك شوية، ممكن تقدم برضو ما يثبت صلة القرابة مع ابوك. لازم كمان تقدم جواب بالانجليزي فيه موافقة من ولي امرك بانه ناوي يصرف على تكاليف رحلتك ويوقعه فقط مع بيانات التواصل بتاعته وصور جواز سفره او بطاقته.
٨- اولاياء الامور: سفر احد الوالدين مع الاطفال بدون تقديم موافقة الوالد الآخر للسفر منفردا بالاطفال.
في حالة سفر الاب او الام لوحدهم وغير مجتمعين (في حالة انفصال، طلاق، اي ظروف مشابهة) مع الاطفال، لازم تقدم موافقة الطرف الاخر على السفر. بعض السفارات بتطلب موافقة رسمية ممضية ومشهرة في الشهر العقاري البعض الآخر بيطلب موافقة خطية مكتوبة على صورة جواز الطرف الآخر.
كان ليا تجربة سفر مع بنتي الى فرنسا من ٣ سنوات وقامت مامتها بكتابة الآتي: “اقر انا فلان الفولاني، بموافقتي على سفر ابنتي مع والدها الى فرنسا من تاريخ كذا الى تاريخ كذا، على ان يعودا بعد اجازتهم سويا الى القاهرة في تاريخ كذا” .
ممكن تتأكد كمان من الصيغة في السفارة وطريقة تصديقها على الموافقة (كتابية فقط ولا لازم مسجلة في مكان رسمي).
٩- للرحلات الرسمية: التقديم على تأشيرة بدون المستندات الداعمة مثل: تفاصيل المتقدم، تفاصيل سبب الزيارة، خطاب دعوة،
او تاكيد على تغطية النفقات. في حالة مصاحبة عضو في العائلة للمتقدم، يجب التقدم بما يفيد القدرات المالية لتغطية نفقات العائلة (كشف حساب بنكي واصول اخرى)
يعني لو مسافر اجتماعات شغل او تحضر معرض او مؤتمر، لازم تقدم جميع التفاصيل عن طبيعة زيارتك والهدف منها، جواب دعوة من الشركة او المؤتمر، مصاريف الاشتراك في معرض او مؤتمر.
اثبات لتغطية نفقات الرحلة من شركتك الي مسافر معاها او الشركة المستضيفة ليك هناك. لو مسافر معاك احد اعضاء عائلتك، واخد مراتك معاك المؤتر ولا المعرض، لازم تثبت قدرتك على تغطية نفقاتكم في الرحلة وتقدم كشف حساب بنكي خاص بيك شخصيا او بيها.
١٠- الرحلات المدعومة: الاخفاق في تقديم كشف حساب بنكي خاص. حتى ولو كانت رحلتك مدعومة، يجب تقديم كشف حساب بنكي شخصي.
يعني لو شركة عزمتك على رحلة ومتكفلة بجميع مصاريفها وقدمت كل الاثباتات المطلوبة في النقطة السابقة، لسه برضو لازم تقدم كشف حساب البنك الخاص بيك.
الخلاصة
من الواضح ان احد اهم الاسباب في الرفض هو الفشل في عدم اثبات القدرة المالية وتقديم كشف حساب مقنع للسفارة بقدراتك المالية وعدم نيتك الهرب الى بلادهم وعدم الرجوع مرة اخرى..
شير مع الي ناوي يسافر اوروبا قريب واترفض او خايف يترفض
تعليقات
إرسال تعليق